Góð veiði í Flókadalsá árið 2026

Góð veiði í Flókadalsá árið 2026Veiðiskýrsla Flókadalsár fyrir árið 2026 hefur nú verið tekin saman og sýna tölurnar að veiðisumarið var gott. Alls voru 1.575 fiskar skráðir í veiðibækur árinnar, samanborið við 1.302 fiska árið 2025.

Það samsvarar um 21% aukningu milli ára. Bleikjan var sem fyrr uppistaðan í veiðinni. Alls voru skráðar 1.191 sjóbleikja og 14 staðbundnar bleikjur, eða samtals 1.205 bleikjur. Það er um 28% meiri bleikjuveiði en árið 2025.

Laxveiðin tók einnig verulega við sér. 54 laxar voru skráðir árið 2026 samanborið við 24 árið áður. Laxveiðin hefur því meira en tvöfaldast milli ára. Auk þess voru skráðir 214 urriðar, 101 sjóbirtingur og einn hnúðlax.

Á efra veiðisvæðinu voru skráðir 932 fiskar, þar sem sjóbleikjan var nær einráð. Á neðra svæðinu voru skráðir 643 fiskar og þar var tegundasamsetningin fjölbreyttari. Hópsvatn var aflahæsti skráði veiðistaður neðra svæðisins með 436 fiska.

Alls var 384 fiskum sleppt aftur, eða 24,4% af heildarveiðinni. Af 54 skráðum löxum var 16 sleppt aftur. Stærsti skráði lax sumarsins var 6,4 kg og 85 cm, veiddur í Merkjahyl 15. september. Mesta skráða veiði á einum degi var 23. júlí þegar 97 fiskar voru skráðir.

Veiðiskýrslan inniheldur nánari sundurliðun eftir tegundum, veiðisvæðum og mánuðum ásamt samanburði við árið 2025.

Veiðiskýrslu Flókadalsár 2026 má nálgast hér.

Deildu póstinum: